नमस्ते तथा सेवाढोग मेरा आदरणीय क्वोंन्मै माइती बुवाहरु, काकाहरु र दाज्युभाईहरू,
प्रिय दिदीबहिनीहरू (चेलीबेटीहरू) अनि समस्त तमुजनप्रति हार्दिक अभिवादन !

कुनै पनि सामाजिक वा जातीय संस्थालाई सशक्त, सन्तुलित र दिगो रूपमा अघि बढाउन महिला विभागको भूमिका अत्यन्तै महत्वपूर्ण हुन्छ । महिलाहरू समाजको आधा हिस्सा मात्र होइनन् उनीहरू सामाजिक चेतना बढाउनमा, संस्कार संस्कृतिको संरक्षण तथा प्रबर्ध्दन गर्नमा र आफ्नो सन्तानहरुलाई अर्थात् नयाँ पुस्ताहरुलाई मूल्य–मान्यता सिकाउनमा र शिक्षा प्रवाहमा महिलाहरुको प्रमुख भूमिका रहेको हुन्छ र उनीहरु प्रमुख माध्यम पनि हुन् । महिला विभागले महिलाहरूको नेतृत्व क्षमता, निर्णय–प्रक्रियामा सहभागिता, र लैङ्गिक समानताको वातावरण निर्माणमा अमूल्य योगदान पुर्‍याएको हुन्छ । यसले संस्थाभित्र विविध सोंचहरु वा बिचारहरु प्रबाह गर्नुको साथसाथै सहकार्य, सहानुभूति र समावेशी दृष्टिकोण पनि विकास गराउँछ जसले गर्दा संगठन वा संस्थालाई अझ सुदृढ र प्रभावकारी बनाउन मद्दत पुर्याउछ ।

विशेषगरी गुरुङ (तमु) समुदायका संस्थाहरूमा महिला विभागको भूमिका अझ गहिरो र अर्थपूर्ण हुन्छ र छ । गुरुङ संस्कृतिमा महिला र पुरुष दुवैको समान सहभागिता प्राचीन कालदेखि नै सम्मानित रूपमा रहँदै आएको छ र आधुनिक संरचनामा पनि महिलाहरुलाई औपचारिक र संस्थागत रुपमा सहभागिता सुनिश्चित गराउँदा समग्र संस्थाको बिकासमा महिला विभाग एउटा सेतु हुन्छ भन्ने कुरामा दुइमत नहोला । महिला वा चेलीबेटी बिभागमार्फत महिलाहरूले सांस्कृतिक कार्यक्रम, शिक्षा, स्वास्थ्य र आर्थिक सशक्तीकरणका विविध कार्यहरू सञ्चालन गर्दा समग्र समुदायको उत्थानमा योगदान पुर्‍याइरहेका हुन्छन वा छन् ।

संस्थामा महिला वा महिला बिभागको महत्वलाई मनन अनि आत्मसात गर्दै जसरी क्वोंने (घोताने/घोण्डे) गुरुङ (तमु) समाज यूकेले आमा समूहको सट्टा “चेलीबेटी विभाग” गठन गरी संस्थाको अभिन्न, सक्रिय र अनन्य विभागका रूपमा मान्यता प्रदान गरेकोमा म हार्दिक आभार व्यक्त गर्दछु । यस समाजले चेलीबेटीहरूलाई यस किसिमको अवसर, सम्मान र विश्वास प्रदान गरिरहँदा हामी चेलीहरुमा आत्मविश्वास, निर्णय–क्षमता र नेतृत्व–विकासमा ठूलो सहायोग पुगेको छ र यो कार्य अत्यन्तै प्रेरणादायी छ । मैले सधै भन्ने गर्छु — हामी चेलीबेटीहरूको (वा विभागको) काम वा कर्तब्य भनेको दाजुभाइहरूलाई साथ, सहयोग र उत्साह दिने हो, जहाँ पातलो हुन्छ त्यहाँ बाक्लो गरिदिने र हैसेमा हौसे थप्ने ! चेलीबेटीहरुको तर्फबाट सकेको सहयोग गर्ने हाम्रो प्रमुख कर्तब्य अनि धर्म हो भन्ने लाग्छ । यसै जिम्मेवारीलाई हामीले समर्पित भएर, सशक्त भएर लागिपरेका छौ र यसबाट संस्थाको सामूहिक उपलब्धिमा टेवा पुगेको छ भन्ने लागेको छ । अन्त्यमा, यस सुनौलो अवसर प्रदान गरेकोमा क्वोंने (घोताने/घोण्डे) गुरुङ (तमु) समाज यूकेलाई हार्दिक आभार तथा धन्यवाद व्यक्त गर्न चाहन्छु ।

जय तमुमै !
जय क्वोंने (घोताने/घोण्डे) गुरुङ (तमु) समाज यूके ।

स-स्नेह तपाइकै चेली-
श्रीमती लिना क्वोंन्स्यो गुरुङ
चेलीबेटी प्रमुख
क्वोंने (घोताने/घोण्डे) गुरुङ (तमु) समाज यूके